தமிழ் தொலைக்காட்சியில் நெடுந்தொடர்

தமிழ் தொலைக்காட்சியில் நெடுந்தொடர்

நெடுந்தொடர்கள் (மெகா சீரியல்) தமிழ் தொலைக்காட்சிகளின் ஓர் மறுக்கமுடியாத அங்கமாகிவிட்டபடியால் சிறிது அதை பற்றி பேசுவோம்...

இன்றைய தேதியில், ஒரு நாளைக்கு சுமார் 25 முதல் 30 நெடுந்தொடர்கள் ஒளிபரப்பாகி மக்களுக்கு நலம் பயக்கின்றன. :) தாங்களும் இந்த பொதுச்சேவையில் பங்குபெற வேண்டுமா? இதோ அதற்கான சில எளிய வழி முறைகள்:

1. ஒரு மங்களகரமான பெயரை தொடருக்கு முதலில் தேர்வு செய்ய வெண்டும்! (உதாரனம்: குத்துவிளக்கு, குடும்பவிளக்கு). நீச்சலடி சுந்தரி போன்ற பெயர்கள் அறவே எடுபடாது.

2. ஓய்வுபெற்ற ஓரு முன்னாள் சினிமா கதாநாயகியை நமது தொடரின் நாயகியாக்கி அவர் உலகிலுள்ள அனைத்து நற்பண்புகளையும் கொண்டவராக காண்பிக்கவேண்டும்.

3. பல லட்சங்களை கொட்டி, ஸ்ரீரங்கத்திலோ, சிதம்பரத்திலோ தொடருக்கு ஒரு நல்ல அறிமுக பாடல் (டைட்டில் சாங்க்) அமைக்க வேண்டும். பிரபல இசையமைப்பாளரின் இசையில் நித்யஸ்ரீ மஹாதேவணோ, பாம்பே ஜெயஸ்ரீயோ இந்த பாடலை கட்டாயமாக பாடவேண்டும்.

4. கதை முக்கியமல்ல (நமது தொடரை பார்க்கும் ஜனங்களே அதை பற்றி கவலை படாத பொழுது, நமக்கு ஏன் அந்த கவலை!). ஆனால் கதை சொல்லும் விதம் மிகவும் முக்கியம். உதாரனம்: ஒரு தெருவில் நமது கதாபாத்திரம் நடந்து வரும் காட்சி என்றால், முதலில் அந்த தெருவை கிழக்கு மேற்க்காகவும் பின்பு வடக்கு தெற்காகவும் காட்டிவிட்டு அடுத்த காட்சியில் அந்த தெருவின் அக்கோடியிலிருந்து வரும் ஒரு ஸ்கூட்டரையோ / ஆட்டொவையோ இக்கோடி வரும்வரை காட்டி விட்டு, விளம்பர இடைவேளை விடவேண்டும். இடைவேளையின் பிறகு, அந்த தெருவில் ஒரு வீட்டை காண்பித்துவிட்டு பின் மெதுவாக நம் கதாபாத்திரம் அந்த தெருவில் நடந்து வருவதை காண்பிக்கவேண்டும். இந்த ஃபார்முலா மூலம் ஒரு பைசா பெராத விஷயத்தை 400 - 500 எபிஸோடுகளுக்கு ஒட்டிவிடலாம்.

5. தயாரிப்பாளரான உங்கள் பெயரை "க்ரீயேடிவ் ஹெட்" என்று அடிக்கோடிட்டு தலைப்பில் போட்டுக்கொள்ள வேண்டும். இதில் தங்கள் குடும்பத்தினர் பெயர்களையும் சேர்த்துக்கொள்ளாம்.

6. விளம்பரதாரர் பற்றி அலட்டிகொள்ள வேண்டாம். அவர்கள் தானாக வருவார்கள். முந்தினம் ஒளிபரப்பிய அதே எபிஸொடை மறுபடியும் ஒளிபரப்பினாலும் விளம்பரதாரர்கள் வந்துவிடுவார்கள்.

7. உங்கள் தொடர் நீண்ட காலம் ஓளிபரப்பாகி வெற்றியும் பெறவெண்டுமா? (மேற்கண்ட அனைத்தையும்விட முக்கியம்!) நீங்கள் ஒரு பொழுதும் உங்கள் தொடரை பார்த்துவிடாதீர்கள்.
:)